Durangoko EAJ-PNVk, gazteen etxebizitza-eskubideen alde eta beren bizitza-proiektua udalerrian garatzeko duten eskubidearen alde, proposamen zehatz batzuk egin ditu herriak dituen bizitegi-erronkei aurre egiteko. Jeltzaleentzat, Durangon etxebizitza duina izatea oinarrizko eskubide negoziaezina da, eta erakunde guztiek bermatu behar dute, bereziki beren herrian bizi eta hazi nahi duten belaunaldi gazteenek.

Azken Euskal Soziometroaren arabera (2025eko abendua), biztanleen % 58k uste dute etxebizitza dela euskal gizarteak aurre egin beharreko arazo larrienetako bat, eta durangarren % 15,3k diote etxebizitza dela beren komunitateari eragiten dion arazo nagusia. Egoera horren aurrean, EAJ-PNVk azpimarratu du erronka horri aurre egiteko neurri tekniko eraginkorrak, erakundeen arteko lankidetza irmoa eta epe luzerako politikak garatzea ahalbidetuko duen adostasun politiko sendoa behar direla.

Horregatik, EAJ-PNVk Durangoko Udalean ordezkatuta dauden talde politiko guztiei proposatu die etxebizitzaren aldeko itun bat sinatzea, hainbat neurrirekin batera, herritarren bizitoki-beharrei aurre egiteko esparru komun eta adostu bat ezartzea ahalbidetuko duena. Itun horrek abiapuntu izan behar du etxebizitza irisgarriak eta guztion beharretara egokituak izango dituen Durango eraikitzeko.

Proposamenak:

1.           ETXEBIZITZAREN ALDEKO ITUNA: Durangoko Udalean ordezkatuta dauden alderdi politiko guztien arteko itun bat lortzea, etxebizitza-politika bateratua garatzea ahalbidetuko duena, 5 urteko eperako plan moderatu bat ezarriz.

2.           Babes publikoko etxebizitzak eraikitzea: Eusko Jaurlaritzarekin lankidetzan, babes sozialeko etxebizitzen eta etxebizitza tasatuen eraikuntza bultzatzea, Eusko Jaurlaritzarekin hitzarmen bat sinatzea lehenetsiz.

3.           Zuzkidura-bizitokiak eta egoitza-irtenbide berritzaileak: belaunaldien arteko etxebizitza-parke publiko bat sustatzeko aukera aztertzea, cohousing-a, gazteentzako ostatuak eta adinekoentzako egoitza-etxebizitzak barne.

4.           Durango Eraikitzen sozietate publikoa indartzea: Durangon etxebizitzaren arloko ekintzak eta programak garatzeko beharrezkoak diren baliabideak esleitzea eta kudeaketa-gomendioak ematea.

5.           Etxebizitza gaietan jendearentzako arreta bulegoa: Ordutegi finkoa izango duen arreta bulego bat irekitzea, kokapen estrategiko batean, herritarrek etxebizitza gaietan dituzten beharrei erantzuteko.

6.           Hutsik dauden etxebizitzak alokairuan jartzeko kanpaina: Hutsik dauden etxebizitzak alokairuan jartzeko informazio- eta kontzientziazio-kanpaina bat abian jartzea.

7.           Hobaria OHZn: % 90erainoko hobaria OHZn, administrazio publikoek kudeatutako etxebizitza hutsen edo alokairu eskuragarriaren programei atxikitako higiezinentzat.

8.           Etxebizitza hutsen errekargua: OHZn % 75era igotzea bi urte baino gehiago modu iraunkor eta justifikatu gabean okupatzen ez duen etxebizitzaren errekargua.

9.           Birgaitzeko diru-laguntzen lerroa: hutsik dauden etxebizitzak birgaitzeko eta alokairuan jartzeko diru-laguntzen lerro berri bat irekitzea, urtean gutxienez 40.000 €-ko aurrekontuarekin.

10.         Lonjak eta bulegoak etxebizitza bihurtzea: lonjak eta alturako bulegoak, merkataritzakoak ez diren eremuetan, bihur daitezen sustatzea, bizigarritasun-dekretuaren baldintzak betez.

11.         Hutsik dauden lonjak aztertzea: etxebizitza bihur daitezkeen lonja hutsen azterketa egitea eta kanpaina espezifiko bat abian jartzea.

12.         Zuzkidura-bizitokien sustapena: Zuzkidura-bizitokien sorrera sustatzea hirigintza-plangintzak ekipamendu deklaratutako lurzoruetan, zerbitzu espezifikoak emateko beharrezkoa ez denean.

13.         BIZIHABI programaren informazio-hitzaldiak: Durangon bakarrik bizi diren adinekoei eta haien familiei zuzendutako informazio-hitzaldiak antolatzea.

14.         Gazteen alokairurako udal-laguntzen deialdia berrikustea: Gazteen alokairurako udal-laguntzen deialdia berrikustea, Eusko Jaurlaritzaren laguntzekin bateragarri eginez.

15.         Etxebizitza turistikoen azterketa: Durangon dauden etxebizitza turistikoei buruzko azterlan bat egitea eta arazoak prebenitzeko neurriak zehaztea.

Durangoko EAJ-PNVk Udalean ordezkaritza duten alderdi guztien babesa eta erantzukizuna eskatu du, Durangoko gazteei eta familiei etorkizun bidezkoagoa bermatuko dien etxebizitzaren aldeko ituna lortzeko.