Ondarroako EAJ-PNVk uste du 2026ko udal aurrekontuek arazo estruktural bat berresten dutela: baliabide gehiago egon arren, ez dago inbertsiorako anbiziorik, ezta lehentasun argirik ere.

Aurrekontua 13,5 milioi eurokoa da —aurreko ekitaldian baino 1,5 milioi gehiago— eta Udalak, gainera, ia 5 milioi euroko diruzaintza-gerakina dauka. Hala ere, inbertsio errealetara bideratutako partida 205.000 eurora baino ez da iristen.

“Aurrekontu handiagoa eta dohaintzan jasotako akzioen salmentatik 3,9 milioi euro izan arren, 205.000 euro soilik inbertsioetara bideratzeak argi erakusten du arazoa ez dela dirua, borondate eta proiektu falta baizik”, adierazi dute jeltzaleek.

Kontrastea nabarmena da eskualde mailan ere: beste udalerri batzuek inbertsio ausartagoak aurreikusten dituzten bitartean, Ondarroak ez du herriaren errealitatea eraldatzeko inbertsio nahikorik bideratzen.

EAJ-PNVren ustez, datu horrek berretsi egiten du 2026a beste urte galdu bat izango dela Ondarroarentzat, aurrekontuak ez dielako udalerriaren egiturazko beharrei erantzuten, ezta eskuragarri dauden aparteko baliabideak behar bezala aprobetxatzen ere.

3,9 milioi euro, ibilbide-orri argirik gabe: aukera historikotik kudeaketa zalantzagarri batera

Lehentasun faltaren adierazgarri argiena, EAJ-PNVren arabera, Telesforo Urrestik dohaintzan emandako akzioen salmentatik lortutako 3,9 milioi euroen kudeaketa da.

“Herriarentzat onura estrategikoa ekarri behar zuten aktiboak dira. Inbertsio plan zehatz eta argi bat izatea espero genuen, baina inprobisazioa da nagusi”, azpimarratu dute.

Aurreikusitako jardueren artean dago Anexuko aparkaleku disuasorioa egokitzeko lanak. Guztira 1,2 milioi euro bideratuko dira lanetara. EAJ-PNVren iritziz, kopurua neurrigabea da eta ez dio egiturazko konponbiderik ematen Ondarroak duen aparkaleku arazoari.

Halaber, diru kopuru horren zati handi bat Zeledonio Arriola, frontoi estalia edo mojen eraikin zaharreko beheko lokalak bezalako proiektuak idaztera bideratuko da, baina ez dago haiek gauzatzeko egutegi zehatzik. “Ez dugu zalantzan jartzen planifikazioaren beharra. Zalantzan jartzen duguna da, hainbeste urteren ondoren, milioiak proiektuak idaztera bideratzen jarraitzea, obrak eta hobekuntzak iritsi gabe dauden bitartean. Ondarroak ekintzak eta emaitzak behar ditu, lehenbailehen. Ezin dugu gehiago itxaron.”

EAJ-PNVren arabera, ondorioa argia da: “2026a beste urte galdu bat izango da Ondarroarentzat, EH Bilduk berriro erakusten duelako baliabideak badituela, baina proiekturik ez.”

Alternatiba bat, lehentasun argiekin Ondarroarentzat

Norabide falta honen aurrean, EAJ-PNVk proposamen zehatzak aurkeztu ditu ezohiko baliabide horiek etorkizuneko benetako estrategia bihur daitezen Ondarroarentzat.

Lehenik eta behin, jeltzaleek ezinbestekotzat jotzen dute HAPO berria martxan jartzea, hirigintza garapena antolatzeko, aukera ekonomikoak sortzeko eta udalerriaren hazkunde orekatua bermatzeko funtsezko tresna baita. "Hirigintza-plangintzarik gabe ez dago etorkizun antolaturik, ezta eraldatzeko benetako gaitasunik ere", nabarmendu dute.

Bigarrenik, EAJ-PNVk proposatu du 150.000 euro bideratzea ingeniaritza eta hirigintza eskarmentua duen talde tekniko profesional bat kontratatzeko, Ondarroako aparkaleku-beharrei buruzko azterketa integral eta independente bat egiteko. Helburua honako hauek zorrotz aztertzea da:

•            Benetako bideragarritasuna duten kokapenak.

•            Baimenen, epeen eta kostuen arloko baldintza nagusiak.

•            Inbertsio-eredurik egokiena (publikoa, mistoa edo emakidazkoa).

•            Epe ertain eta luzerako alternatiba eraginkorrenak.

"Gaur egun Anexuko proiektuan ari dira lanean, baina ez dago udalerri osorako soluziorik onena zein den zehazten duen azterlan orokorrik. Jarduera isolatu batean 1,2 milioi euro konprometitu aurretik, ezinbestekoa da diagnostiko oso bat izatea, denboran erabaki arduratsuak eta iraunkorrak hartu ahal izateko ", defendatu dute.

Azkenik, EAJ-PNVk haur-parkeak eta espazio publikoak sakonki berritzea proposatzen du, ingurune irisgarriak, seguruak eta kalitatezkoak izateko helburuarekin.

Ondarroak baliabideak ditu eta aukera historikoa du. EAJ-PNVren ustez, plangintza, egonkortasuna eta kudeaketa zorrotza falta dira. "Udalerriak ezin du beste urte bat benetako aurrerapenik gabe igaro. EAJ-PNVk alternatiba serio eta arduratsua ordezkatzen du", esan dute.