Etxebarriko EAJ-PNVk positiboki baloratu du Erbera Kalea oinezkoentzat jartzeko bigarren faseari emandako bultzada. Proiektu hori maiatzeko udal batzarrean onartuko da, Altzibar inguruko urbanizazio lanen lizitazio prozesua aktibatzearekin batera.

Jarduketak jarraipena emango dio udalerriarentzako estrategikoa den esku-hartze bati. Proiektua faseka planteatu da, herriarentzat funtsezkoa den ardatz hori pixkanaka eraldatzeko helburuarekin.

Jeltzaleek nabarmendu dute proiektu honek herritarren babes sendoa duela, parte-hartze prozesuetan inplikatu diren herritarren % 72a ekimenaren alde agertu baita. "Datu horrek argi eta garbi erakusten du proiektu partekatu baten aurrean gaudela, etxebarritarren benetako eskaerari erantzuten diona eta udalerriko egunerokotasuna hobetuko duena", adierazi dute.

Proiektuak espazio publikoa berrantolatzea aurreikusten du, oinezkoen zirkulazioa lehenetsiz, segurtasuna hobetuz eta lasai egoteko gune eta berdegune berriak sortuz.

EAJ-PNVk fasekako plangintza balioetsi du kudeaketa arduratsu eta eraginkorraren berme gisa, epe luzeko ikuspegiarekin herri-eraldaketa sakonei ekiteko aukera ematen baitu.

“Inprobisazioaren aurrean, planifikazioan, parte-hartzean eta etengabeko hobekuntzan oinarritutako kudeaketa defendatzen dugu. Proiektu hau politika erabilgarriaren adibide bat da, Etxebarria irisgarriagoa, jasangarriagoa eta pertsonentzako pentsatuagoa eraikitzeko. Entzun, adostu eta egin. Hori da bidea”, azpimarratu dute jeltzaleek.

Aurrerapen honekin, EAJ-PNVk herritarren ongizatea ardatz duen udal politikarekiko konpromisoa berresten du, hiri garapen eredu orekatua, parte-hartzailea eta kalitatezkoa sendotuz.