Durangoko EAJ-PNVk EH Bilduk gaur etxebizitzaren inguruko ezohiko bilkuran aurkeztutako neurrien aurka bozkatu du, “irtenbide berriak ekarri beharrean titularrak sortzeko pentsatutako zentzurik gabeko osoko bilkura” dela iritzita. Talde jeltzaleak gogorarazi du deialdi honek 2.000 euroko gastua ekarriko diola udalaren diru-kutxari, dieta kontzeptuan, “jada eztabaidatu, landu eta neurri handi batean udalaren lan-ildoan txertatuta dauden proposamenak” jorratzeko.

EAJ-PNVk azpimarratu du Durangok baduela jada 15 neurri zehatz biltzen dituen Udal Etxebizitza Plana, martxoan onartua, Etxebizitza Mahaian hilabeteetako lanaren ondoren. Plan horrek alderdi politiko guztien proposamenak jasotzen ditu, baita EH Bilduk egindako hainbat ekarpen ere. “Talde guztien proposamenak onartu ziren akordio zabal bat eraikitzeko. Hala ere, EH Bilduk abstenitzea erabaki zuen, eta orain berritasun gisa aurkezten ditu jada mahai gainean dauden eta, kasu askotan, martxan dauden neurriak”, deitoratu dute.

Talde jeltzaleak azaldu duenez, etxebizitza-politikak ulertzeko moduan dauden desberdintasunei ere erantzuten diola ezezkoa. EH Bilduk alokairu babestuan soilik oinarritutako eredu bakarra inposatzea proposatzen duen bitartean, EAJ-PNVk, aukerak zabaltzea eta Durangaldeko herritarren behar, errealitate eta bizi-proiektu aniztasuna errespetatzea, alokairua eta erosketa babestua konbinatuz, askotariko egoerei erantzun desberdinak ematearen alde egiten du.

Udalak etxebizitza publikoa erosteko zorpetu behar izatea ere arbuiatu du, Eusko Jaurlaritzarekin eta beste erakunde batzuekin lankidetzan aritzearen alde eginez, parke babestua eraginkortasun handiagoz handitzeko. Era berean, etxebizitza hutsei buruzko kanonaren aurrean, alderdi jeltzaleak “laguntzea, aholkatzea eta pizgarriak ematea, zigortzen ez hastearen aldeko apustua egin du”, etxebizitza horiek merkatuan berme osoz sar daitezen erraztuz.

Durangoko EAJ-PNVk etxebizitzaren arloan egindako kudeaketa defendatu du

Zentzu horretan, Durangoko EAJ-PNVk legegintzaldi honetan egindako kudeaketa aldarrikatu du. 22 etxebizitza tasatu, 16 udal-etxebizitza sozial alokairuan, Durango Eraikitzen indartzea, zerbitzu juridiko espezializatu bat abian jartzea, etorkizuneko Etxebizitzaren Udal Bulegoa eta etxebizitza hutsak mobilizatzeko neurri berriak dira dagoeneko eman diren urratsetako batzuk. “Batzuek osoko bilkura bereziak antolatzen dituzten bitartean, Udalak denbora darama ekintzekin, plangintzarekin eta neurri zehatzekin lanean”, nabarmendu dute.

Aurreko legealdian EH Bilduk etxebizitzaren arloko egiturazko neurri garrantzitsurik bultzatu ez zuela gogorarazi nahi izan du alderdi jeltzaleak. “Ez zen planik egon, ez zen ibilbide-orririk egon eta ez zen benetako aurrerapenik egon. Deigarria da lau urtez ezer egin ez zutenek orain lezioak eman eta 'plan handi' bat aurkeztu nahi izatea, hutsetik abiatuko balira bezala”, kriikatu dute.

“Etxebizitza Durangoko erronka handienetako bat da, eta seriotasunez tratatzea merezi du. Propaganda gutxiago, postureo gutxiago eta lan erabilgarri gehiago. Hori da EAJ-PNVtik egiten jarraituko duguna”, amaitu du alderdi jeltzale durangarrak.