Muxikako EAJ-PNVk konpromisoa eta erabateko sintonia erakutsi du herritarrek BI-635 errepidearen egoerari buruz azaldu duten kezkarekin. Alderdi jeltzaletik adierazi dutenez, “bat gatoz trafikoaren intentsitateak, bide-segurtasunak eta auzoak segurtasunez lotzeko zailtasunek sortzen duten kezkarekin, arazo horrek eragin zuzena baitu egunerokoan eta muxikarren bizi-kalitatean”.

Era berean, jeltzaleek azpimarratu dute kezka hori aspalditik dagoela mahai gainean, eta gogorarazi dute auzokideen mobilizazioak sortu baino lehen ere lanean ari zirela benetako konponbideak bideratzeko, eskualdea suspertzeko planean proiektu estrategikoak txertatuz eta mugikortasunarekin eta bide-segurtasunarekin lotutako jarduera zehatzetan aurrera eginez.

Testuinguru horretan, alderdi jeltzale muxikarrak Eskualdea suspertzeko plan horretan jasotako ekimenen balioa nabarmendu du. Besteak beste, Muxika eta Gernika arteko bizikleta eta oinezko-lotura (trazadura-aukera desberdinak proposatu dira horretarako); udalerriko industria-garapenari eta Boane-Arana industrialdeari lotutako sarbideak hobetzea; eta Zugaztieta-Ariatza tartean BI-635 errepidea hobetzeko Bide Plan Berezia idaztea eta izapidetzea. Jarduketa estrategiko hori bide-segurtasuna indartzera, auzoen arteko lotura hobetzera eta bide hori egungo mugikortasun-beharretara egokitzera bideratuta dago.

BI-635 errepideko trafikoaren funtzionaltasuna eta kudeaketa hobetzeko beste neurri osagarri batzuk ere lantzen ari dira, hala nola Kurtzeroko elkargunearen azterketa, semaforoen erregulazioan doikuntzak aztertzeko, auto-pilaketa murrizteko eta zirkulazio arinagoa eta seguruagoa errazteko.

Proiektu horiek guztiak udalerriaren barne-konektibitatea indartzeko eta Busturialde osoan mugikortasun iraunkorra hobetzeko ibilbide-orri zabalago baten parte dira.

Muxikako EAJ-PNVk arduraz eta erakundeen arteko elkarrizketatik lan egiten jarraitzeko konpromisoa berretsi du, hobekuntza horiek aurrera egin dezaten, Muxikak erantzun serio, bideragarri eta planifikatuak behar dituela sinetsita. “Auzokideen kezkarekin bat gatoz, gurea ere badelako, baina gai hau ez da orain hasten: denbora daramagu hainbat erakundetatik lanean Muxikak behar dituen azpiegiturak eta loturak izan ditzan”, ondorioztatu du alderdi jeltzaleak.