Trapagarango EAJ-PNVren udal taldeak Udaltzaingoa gaur egun jasaten ari den egoera larria salatu du, plantilan dauden bajen betetze faltaren ondorioz. Jeltzaleen esanetan, egoera horrek zuzenean eragiten die herritarren segurtasunari eta lasaitasunari.

Beraien ustez, "ulertezina" da alkateak, Udaltzaingoaren eta Giza Baliabideen eta Herritarren Segurtasunaren arloko arduradun nagusiak, Trapagaran bezalako udalerri batean funtsezko zerbitzu bat bermatu eta indartzeko neurririk hartu ez izana. Izan ere, udalerriak eremu zabala du, auzo sakabanatuak eta garai honetan gainera jarduera sozial eta jaiekin lotutako hitzordu asko ditu.

EAJ-PNVk gogorarazi du gaueko zerbitzua kendu ondoren, eguneko zerbitzuaren egoera ere kritikoa izaten hasi dela. Gaur egun, lantaldea osatzen duten 16 langileetatik 7 bakarrik daude zerbitzu aktiboan. Hori dela eta, patruilarik gabeko lanaldiak daude kaleetan, baita polizia-etxea bera itxita dagoen uneak ere.

"Herritarren segurtasunak eta segurtasun-pertzepzioak lehentasun osoa izan behar dute edozein Udalentzat", adierazi dute udal-taldetik. "Herritarrek sentitu behar dute poliziaren presentzia nahikoa eta hurbilekoa dela, batez ere Trapagaran bezalako udalerri zabal batean, non auzoek etengabeko arreta eta berehala erantzuteko gaitasuna behar duten".

Alderdi jeltzaleak ohartarazi du, gainera, langile faltak ez duela soilik herritarrentzako arretan eragiten, baita gero eta tentsio handiagoa dagoen egoera honetan zerbitzua ematen jarraitzen duten agenteen lan-baldintzetan eta segurtasunean ere.

Era berean, EAJ-PNVk gogorarazi du Udaltzaingoa funtsezko eta nahitaezko zerbitzua dela 5.000 biztanletik gorako udalerrietan, indarrean dagoen legediak ezartzen duen bezala, eta bereziki kezkagarritzat jotzen du egoera hori, hain zuzen ere, auzoetako jaiak eta kaleko hitzorduak areagotzen ari diren garaian sartu garelako.

Horregatik guztiagatik, Udal taldeak eskaera formala erregistratu du, Udaltzaingoan dauden baja guztiak berehala betetzeko eta Trapagarango herritarren segurtasuna, bizikidetza eta lasaitasuna bermatzeko premiazko neurriak hartzeko eskatuz alkateari.

Bozeramaile jeltzaleak adierazi duenez, “Udal batek ezin du normalizatu patruilarik gabeko egunak edo gutxieneko zerbitzu eskasak egotea. Trapagaranek Udaltzaingo eraginkorra behar du, udalerriaren benetako beharrei erantzuteko gai dena”.