Leioako EAJ-PNVk bat egin du Udalak bultzatutako gizalegezko azken udal-kanpainarekin, herritarrak espazio publikoa zaintzearen eta errespetatzearen garrantziaz kontzientziatzeko eta udalerrian bizikidetza hobea bultzatzeko helburuarekin.

“Ei! ez ahaztu: Leioa zaintzea guztion ardura da” lelopean, ekimenak auzoetako bizi kalitatean eragin zuzena duten eguneroko jokabideetan jartzen du arreta: maskoten gorotzak jasotzea, paperontziak behar bezala erabiltzea, hiri altzariak zaintzea, abiadura mugak errespetatzea edo bidegorria modu egokian erabiltzea.

Leioako EAJ-PNVk nabarmendu du horrelako kanpainek “herriarekiko konpromiso kolektiboa indartzen” laguntzen dutela, eta gogorarazi du gai horietako asko herritarrek beraiek helarazitako kezkak direla.

Kanpaina hedabideen, sare sozialen, euskarri digitalen eta kalean jarritako hainbat elementuren bidez zabaltzen ari da, mezua herritar guztiengana iristeko eta Leioa zainduagoa, adeitsuagoa eta atseginagoa egiten jarraitzeko.