Bediako EAJ-PNVren Uri Batzarrak aho batez aukeratu du berriro Aitor Sorriketa Larrea 2027ko udal hauteskundeetarako Alkategai gisa.

Bediako EAJ-PNVk azken urteotan hautagaiak egindako lana balioan jarri du, eta udal jardunaren erdigunean herritarren ongizatea kokatu duen proiektuari jarraipena ematearen alde agertu da. Jeltzaleen ustez, urte hauetan egindako lanari esker aurrerapauso garrantzitsuak eman dira Bedian, eta oinarri sendoak ezarri dira udalerriaren beharrei erantzuten jarraitzeko.

Sorriketa Larreak eskerrak eman ditu beregan jarritako konfiantzagatik, eta adierazi du etapa berri honi aurre egingo diola Udalaren buru izan den urteetan erakutsi duen erantzukizun eta prestutasun berarekin. “Urte hauetan pilatutako esperientziak eta herritarrak entzunez egindako lanak indarra ematen digute aurrean ditugun erronkei ilusioz heltzeko. Bediak herri bizia, parte-hartzailea eta aukerak eskaintzen dituena izaten jarraitzea merezi du, eta horren alde lanean jarraituko dugu”, adierazi du.

Era berean, hautagaiak lankidetzaren eta etengabeko entzute aktiboaren garrantzia nabarmendu du, udalerriaren etorkizuna eraikitzen jarraitzeko funtsezko tresna gisa. “Gure lehentasuna herritarren ondoan egoten jarraitzea izango da, haien kezkak ezagutzea eta elkarrekin lan egitea sortzen diren erronkei erantzuteko. Bediak oinarri sendoa du, eta denon artean horren gainean eraikitzen jarraituko dugu”, gaineratu du.

EAJ-PNVk ziklo berri honi ekingo dio udalerriaren errealitatean errotutako eta hurbileko proiektu batekin jarraitzeko borondatez, pertsonenganako harreman zuzenean eta Bediaren nortasunarekiko zein bizimoduarekiko konpromisoan oinarritutako politika egiteko moduari eutsiz.

Profila

Aitor Sorriketa Larrea 1972an jaio zen Bedian, eta bere bizitza pertsonal zein profesional osoa udalerrian garatu du. Ezkonduta dago eta bi alaben aita da. Administrazio eta Finantzetako goi-mailako titulazioa du.

2003tik Bediako Alkatea da, eta bere jarduna herri txikietako balioekin estuki lotutako politika ulertzeko modu batean oinarritu du: auzolana, hurbiltasuna eta herritarrekiko harreman zuzena. Bi hamarkada baino gehiagoz egon da Udalaren buru, udalerriaren garapen soziala, ekonomikoa eta azpiegiturena bultzatzeko helburuarekin, betiere herritarren behar eta kezkei arreta eskainiz.