Gatikako EAJ-PNVren Uri Batzarrak Ibai Isasi Sistiaga aukeratu du 2027ko udal hauteskundeetarako alkategai.

Jeltzaleen esanetan, haren hautagaitzak hurbiltasunean, entzute aktiboan eta herritarrekin partekatutako lanean oinarritutako udal-eredu baten aldeko apustua egiten du. Gatikaren nortasuna galdu gabe etorkizunari begiratzen dion proiektua da, eta auzoen garapen orekatua, euskara, berdintasuna, ingurumenaren jasangarritasuna eta kalitatezko zerbitzu publikoak sustatzen jarraituko du.

Gatikarekiko eta bere elkarte-sarearekiko konpromisoa

Ibai Isasi Sistiagak udalerriarekin duen lotura estua bere kirol-ibilbidean zein Gatikako gizarte-bizitzan izan duen inplikazioan islatzen da. Urte luzez Gatikako K.T.-ko kide izan zen, eta klubaren koloreak defendatu zituen federatutako futbolean. Konpromisoak, ahaleginak eta talde-lanak markatutako etapa izan zen, eta balio horiek gaur egun ere zerbitzu publikoa ulertzeko duen modua gidatzen dute.

Era berean, Gatikako Bagare Alkartean parte-hartze aktiboa du. Elkarte horrek antolatzen du Gatika Herri Trail, udalerriko erreferentziazko kirol-hitzorduetako bat, aurten hirugarren edizioa ospatuko duena.

Profil teknikoa udalerriaren zerbitzura

Ibai Isasi Sistiagak 47 urte ditu, ingeniaria da lanbidez eta euskaldun zaharra. Jasangarritasunaren eta energia-eraginkortasunaren arloan ibilbide profesional sendoa du, eta etorkizuneko erronkei kudeaketa moderno, eraginkor eta arduratsu baten bidez aurre egiteko aukera emango duen profil teknikoa eskaintzen du.

Hautagaiak ilusio handiz eta gatikarren bizi-kalitatea hobetzen jarraitzeko konpromisoz hartu du ardura berria. “Ilusio handiz eta nire herrian EAJ-PNV ordezkatzeak dakarren erantzukizunarekin hartzen dut erronka hau. Herritarrekin batera lanean jarraitu nahi dut Gatikak aurrera egiten jarrai dezan, entzunez, elkarrizketan eta denon artean aukera gehiago, bizi-kalitate hobea eta gazteek beren bizi-proiektua hemen garatu nahi eta ahal izango duten udalerria eraikiz", adierazi du Isasi Sistiagak.