Bakioko EAJ-PNVk Urkitza HLHI handitzeko Eusko Jaurlaritzako Hezkuntza Sailak egindako 9,37 milioi euroko inbertsioari balioa eman dio. Izan ere, Urkitza HLHI handitzea jarduera estrategikoa da udalerriarentzat, eta obrak hasi dira dagoeneko. Alderdi jeltzalearen ustez, proiektu hau urrats erabakigarria da hezkuntza-komunitatearen egungo eta etorkizuneko beharrei erantzuteko eta Bakioko irakaskuntza publikoaren kalitatea indartzen jarraitzeko.

Bakioko EAJ-PNVk gogorarazi du Gobernu Kontseiluak urtarrilean onartu zuela inbertsio garrantzitsu hau, azken urteotan Bakion hezkuntza arloan egindako inbertsio handienetako bat. Bere ustez, obren hasierak agerian uzten du Eusko Jaurlaritzako Hezkuntza Sailak udalerriarekin eta familien hazkundera eta beharretara egokitutako hezkuntza-azpiegiturak hobetzearekin duen konpromisoa.

Alderdi jeltzaleak azpimarratu du eskola handitzea beharrezkoa zela instalazioak udalerriaren bilakaerara egokitzeko eta ikasleei, irakasleei eta hezkuntza-komunitate osoari espazio hobeak eskaintzeko.

"Urkitza HLHI handitzea hezkuntza-komunitatearen aspaldiko beharra zen, eta gaur egun errealitate bihurtzen hasi da. Bakiorentzat oso inbertsio garrantzitsua da, udalerriaren egungo eta etorkizuneko beharrei egokituko zaizkien instalazioak izatea ahalbidetuko duena", nabarmendu dute Bakioko EAJ-PNVtik.

Era berean, nabarmendu dute horrelako inbertsioek erakusten dutela zein garrantzitsua den udalerrien benetako beharrei erantzuteko eta eskola publikoa sendotzeko konpromisoa duten erakundeak izatea.

“Benetan garrantzitsua dena da Bakiok hezkuntza-zentro moderno bat izango duela, datozen urteetako erronkei aurre egiteko prestatua. Proiektu honen atzean plangintza, erakundeen arteko konpromisoa eta Eusko Jaurlaritzako Hezkuntza Sailak sustatutako inbertsioa daude, gure udalerriaren aspaldiko eskari bati erantzuteko”, adierazi dute jeltzaleek.