Foruko EAJ-PNVren Uri Batzarrak aho batez aukeratu du Mikel Magunazelaia Pinaga 2027ko udal hauteskundeetarako alkategai izateko. Erabaki horrek egungo Alkatearenganako konfiantza berritzea eta urte hauetan Udalean egindako lana aitortzea ekarri du. Izan ere, urte horietan gauzatu dira alderdi jeltzaleak aurreko hauteskundeetan udalerriarentzat planteatzen zituen proiektu nagusiak, bai eta forutarren eguneroko beharrak ere.

Magunazelaia Pinagak “ilusioz, arduraz eta Foruaren alde lanean jarraitzeko gogoz" ekingo dio hautagaitza berriari. Benetan eskertzen dut gure taldeko kide guztiek nigan konfiantza berriro jartzea. Elkarrekin egin dugun lanaren aitorpena da, eta, aldi berean, aurrera egiten jarraitzeko konpromisoa”, adierazi du.

Urte hauetan, talde jeltzaleak errealitate bihurtu ditu Foruarekin hartutako konpromiso nagusiak. Besteak beste, udal-taberna martxan jartzea, hirigintza-plangintzak aurrera egitea, Kultur Etxea berritzea, eredu energetiko eraginkorrago eta iraunkorrago baten aldeko apustua egitea eta mediku-kontsultategi berria martxan jartzea.

“Esan eta egin. Gaur atzera begiratu eta hauteskundeetara aurkeztu genuen programaren % 90 baino gehiago bete dugula egiazta dezakegu. Guretzat, emandako hitza betetzea Foruarekiko konpromisoa eta erantzukizuna da”, nabarmendu du hautagai jeltzaleak.

Zentzu horretan, Magunazelaia Pinagak bereziki balioan jartzen du eredu energetiko eraginkorrago baterantz aurrera egiteko egindako lana, LED teknologiaren bidezko argiteria publikoaren pixkanakako berritzearekin eta Joan Mari Torrealdai Kultur Etxearen birgaitze energetikoaren aldeko apustuarekin. Birgaitze-proiektua, gainera, SPHEERE programaren Europako proiektu pilotuetako bat izan da.

Hautagai jeltzaleak, halaber, kudeaketa ekonomikoaren zorroztasuna eta erabateko gardentasuna azpimarratu ditu, Udalari urtero inbertitzeko ahalmena handitzeko aukera eman baitiote, bizilagunei zergak igo gabe.

“Erakutsi dugu plangintza, lana eta konpromisoa daudenean, proiektuak egia bihur daitezkeela. Orain aurrerapausoak ematen eta Foruak dituen erronka berriei aurre egiten jarraitu nahi dugu, betiere hurbiltasunetik eta gure bizilagunei entzunez”, esan du.

Magunazelaia Pinagak laugarren hauteskunde hitzordu bati ekingo dio, lortutako esperientziaren, finkatutako talde baten eta belaunaldi berrien babesaz. “Asko egin dugu, baina oraindik askoz gehiago dago egiteko. Foruak aurrera egin du urte hauetan, baina helburu eta behar berriak ditugu erantzuteko. Lanean jarraitu nahi dugu gure herriak zerbitzurik onenak izan ditzan, udalerri bizia izaten jarrai dezan eta belaunaldi berrientzako aukerak eskain ditzan”.

Foruarekiko lotura eta konpromiso - ibilbide zabala

Mikel Magunazelaia Pinaga, euskalduna eta 30 urtekoa, Foruarekin lotura eta konpromiso handiko ibilbidea du. 2015 eta 2019 artean, Obra eta Zerbitzuetako zinegotzia izan zen, eta, 2019tik, Alkate gisa dihardu; kargu hori 2023ko udal-hauteskundeetan berritu zuen, eta hirugarren legegintzaldiz jarraian egingo dio aurre.

Irakaslea eta historialaria da, Historia Garaikidean masterra du, eta errepresio frankistari buruzko ikerlanak egin ditu Busturialdean.

Bere hautagaitza berriak, EAJ-PNV de Foruaren hitzetan, “esperientzia, taldea eta gazteria” uztartzen ditu, urte hauetan egindako lanarekin jarraitzeko eta udalerriak dituen erronkei aurre egiteko helburuarekin.