Lander Aretxabaleta Jauregi EAJ-PNVren Zamudioko alkategai izango da berriro. Egungo alkateak hautagaitza jeltzalearen buru izaten jarraituko du, agintaldi honetan egindako lanari eta Zamudioren egungo zein etorkizuneko beharrei erantzuteko abian jarritako proiektuei jarraipena emateko helburuarekin.

Aretxabaletak etapa berri honi 2023an alkatetza hartu zuenean izan zituen “ilusio eta konpromiso berberekin” ekingo dio. Bere kudeaketa eredua, azaldu duenez, hurbiltasunean, zorroztasunean eta herritarren beharrak ekintza eta proiektu zehatz bihurtzeko gaitasunean oinarritzen da.

“Aurreko hauteskundeetan izan nituen ilusio eta konpromiso berberekin, Zamudio aurrera eramaten duten proiektuak gidatzen jarraitu nahi dut. Kudeaketa zorrotza, hurbila eta pertsonengan ardaztua defendatzen dugu, konpromiso argi batekin: gure udalerria eraldatzen duten eta zamudioztarren beharrei erantzuten dieten proiektuak bultzatzen jarraitzea”, adierazi du.

Agintaldi honetan, Aretxabaletak gidatutako udal taldeak etxebizitza jarri du jardun politikoaren lehentasun nagusien artean. Urte hauetan Arteagako udal-etxebizitza tasatuen 30 etxebizitzen esleipena jarri da abian, sustapen berriak bultzatu dira eta gazteei zuzendutako alokairurako laguntza-lerro bat garatu da. Guztira, 90 etxebizitza baino gehiago daude 2026an eraikuntza edo esleipen fase desberdinetan.

Udalerriaren eraldaketa ere agintaldiaren ardatz nagusietako bat izan da. Aretxabaletaren gidaritzapean Zamudio Parti jarri zen martxan, herritarren proposamenak jaso eta herriguneko hainbat espaziotan proiektu zehatz bihurtzeko sortutako partaidetza-prozesua. Prozesu horretatik sortu edo aurrera egin dute Arbolantxaren erabateko berritzeak eta beste hainbat jarduketa garrantzitsuk, hala nola Kultur Etxeko plaza estaltzeak eta Uribe oinezkoentzako pasabidea birgaitzeak.

Agintaldi honetan, halaber, udal ekipamenduak eta espazio publikoak hobetzeko hainbat jarduketa egin dira. Horien artean daude Kultur Etxearen birgaitzea eta auzo, instalazio eta eguneroko erabilerako guneetan egindako hainbat esku-hartze.

Inbertsioekin batera, Aretxabaletak arreta berezia jarri du udal-zerbitzuak familien eta herritarren beharretara egokitzean. Aldi honetan 9 eta 11 urte bitarteko umeentzako ludoteka berri bat sortu da, udal eta kirol zerbitzuen ordutegiak zabaldu dira eta gazteen emantzipazioa erraztera bideratutako neurriei jarraipena eman zaie.

EAJ-PNVk, beraz, Aretxabaletaren hautagaitza berria 2023an abiatutako udal-proiektuari jarraipena emateko apustutzat aurkezten du, etxebizitzaren, hiri-espazioaren eta zerbitzu publikoen arloetan oraindik garatzen ari diren hainbat proiekturekin.

Aretxabaletaren esanetan, helburua da hurbiltasunetik eta entzute aktibotik lanean jarraitzea, Zamudio hobetzen jarraitzeko eta herritarren beharrei erantzuteko. Hori guztia, berak kudeaketa-eredua laburbiltzeko erabiltzen dituen lau aditzen bidez: “entzun, erabaki, egin eta kudeatu”.