Urdulizko EAJ-PNVk EH Bildu eta Elkarrekin Podemosen Udal Gobernuari eskatu dio Torrebarri auzoko EK-04 lursailean aurreikusitako jarduketa berriz aztertzeko eta etxebizitza eskuragarria sustatzea ahalbidetuko duen irtenbide baten alde egiteko, etorkizuneko ekipamenduetarako gordetako lurzorua galdu gabe.

Talde jeltzaleak indarrean dauden Arau Subsidiarioei eustea eta EK-04 lursailaren ekipamendu-erabilera babestea defendatzen du, eta etxebizitza babestuak edo tasatuak egiteko dagoeneko urbanizatuta dauden beste lursail batzuk lehenestea proposatzen du, Atzeragaine kasu.

“Ez dugu ulertzen EH Bilduk eta Elkarrekin Podemosek ekipamenduetarako gordetako lurzati bat sakrifikatu nahi izatea etxebizitza sustatzeko bestelako aukerak daudenean. Urdulizek etxebizitza eskuragarria behar du, baina baita plangintza eta etorkizunean behar izan ditzakeen zerbitzuetarako lurzorua ere”, adierazi dute EAJ-PNVtik.

EAJ-PNVk, gainera, gogorarazi du Torrebarri auzoko bizilagunak Landa Torrebarri Auzo Elkartean antolatu direla eta ekainean eta uztailean alegazioak aurkeztu zituztela Udalean. Irailaren 16ko bileraren aktan jasotzen denez, ordura arte ez zuten Udalaren erantzunik jaso alegazio horien edukiari buruz.

“Bizilagunek ezarritako bideak erabiliz aurkeztu dituzte beren argudioak, eta EH Bildu eta Elkarrekin Podemosen Udal Gobernuari gutxienez eskatu beharrekoa da haiei entzutea eta erantzutea”, gaineratu dute.

EAJ-PNVren ustez, etxebizitzak eraikitzeaz gain, Udalak lan egin behar du etorkizuneko sustapenek Urdulizko gazteak eta familiak herrian errotzen lagun dezaten, betiere legearen barruan dauden aukera guztiak aztertuta.

EAJ-PNVren alternatiba

EAJ-PNVren proposamena lau printzipiotan oinarritzen da:

1.           EK-04ren izaera dotazionalari eustea, indarrean dauden Arau Subsidiarioak errespetatuz eta etorkizuneko ekipamenduetarako lurzorua babestuz.

2.           Dagoeneko urbanizatuta dauden lurzatietan, Atzeragaine kasu, etxebizitza tasatuak eta babes ofizialekoak sustatzea, bizilagunen artean gatazka handia sortzen ari den lurzati dotazional batean etxebizitza-jarduketa kontzentratu beharrean.

3.           Etxebizitza publikoa Urdulizko gazteak eta familiak ere kontuan hartuta planifikatzea, etxebizitza-politikak herriko biztanleak bertan errotzen eta herrian bizitzen jarraitzen lagun dezan.

4.           Auzo-mugimenduari entzutea eta erantzutea, Landa Torrebarri Auzo Elkarteak aurkeztutako alegazioei erantzunez eta edozein hirigintza-jarduketak behar besteko informazioa, plangintza eta bermeak izan ditzan bermatuz.

Azken batean, EAJ-PNVk etxebizitzak horretarako prest dagoen lurzoruan egitea ahalbidetuko duen alternatiba defendatzen du, Urdulizek etorkizunean behar izan dezakeen lurzati dotazional bat baldintzatu gabe.