Urdulizko EAJ-PNVren iritziz, eremu horretan azkenaldian egindako jarduketek agerian utzi dute EH Bilduren eta Elkarrekin Podemosen Udal Gobernuaren plangintza eta koordinazio falta.

Talde jeltzaleak gogorarazi du bere garaian desadostasuna agertu zuela Aita Gotzon eta Goieta kaleen arteko bidegurutzean jarritako manparen kokapenarekin, oinezkoen eta gidarien ikuspena murrizten zutelako eta bide-segurtasunean eragina izan zezaketelako. Ohartarazpen horiek egin arren, Udalak manparak jartzea erabaki zuen, gerora paperontzien eta hiri-altzarietako beste elementu batzuen kokapena aldatzera behartu zuten obrak egin aurretik; azkenean, manparak beraiek ere kendu behar izan zituzten.

“EH Bilduk eta Elkarrekin Podemosek azaldu behar dute zergatik gauzatu eta ordaindu zen kokapenagatik aurrez zalantzan jarrita zegoen jarduketa bat, gainera oraindik egiteko zeuden obra batzuen baldintzapean zegoenean”, adierazi dute EAJ-PNVtik.

Talde jeltzalearen ustez, arazoa ez da jarduketa jakin baten kostua bakarrik, baizik eta ikuspegi orokorraren falta. “Lehenengo manparak jartzen dira, ondoren espazioa berrantolatzera behartzen duten obrak egiten dira, eta azkenean manparak kendu behar dira. Hasieratik plangintza egokia egin izan balitz, aldaketa horiek eta gastu hori saihestu zitezkeen”, gaineratu dute.

Manparak kendu eta paperontziak lekuz aldatu ondoren, Udalak banku bat ere jarri du inguru horretan. EAJ-PNVren ustez, haren kokapena ere berrikusi beharra dago, oinezkoen eta ibilgailuen ikuspena eta segurtasuna arriskuan jartzen ez dituela bermatzeko.

Talde jeltzaleak Udal Gobernuari eskatu dio espazio publikoari eragiten dioten jarduketen arteko koordinazioa hobetzeko, eta obrak zein ondorengo hiri-altzarien instalazioa modu bateratuan planifikatzeko.

“Udal kutxako euro bakoitzak benetako behar bati eta plangintza arduratsu bati erantzun behar dio. Ondo kudeatzea aurreikustea, koordinatzea eta hasieratik Urdulizerako irtenbide seguru, erabilgarri eta iraunkorrak bilatzea da”, ondorioztatu dute EAJ-PNVtik.