Ereñoko EAJ-PNVk Ager Lejarreta Garrogerrikaetxebarria izendatu du alkategai gisa 2027ko udal hauteskundeetarako.

Lejarreta Garrogerrikaetxebarria 51 urtekoa eta euskalduna, zuraren sektorean teknikari komertziala da, eta udal-kudeaketari lotutako ibilbide zabala du. Gaur egun, Ereñoko Alkatea da, 2025eko apirilean kargua hartu zuenetik, eta Urremendi Landa Garapen Elkarteko presidentea ere bada.

Udalarekin duen lotura gaztaroan hasi zen, udal-korporazioko kide izaten hasi zenean. Ibilbide hori, udalerriaren, auzoen eta bertako bizilagunen errealitatea eta beharrizanak bertatik bertara ezagutzeko aukera eman dio. Horrez gain, Urremendiren buru izan da azken sei urteetan, Busturialdeko landa-garapenarekin lotutako hainbat ekimen bultzatzen parte hartuz.

Ereñoko egunerokoa hobetzeko jarduerak

Azken legegintzaldian, gobernu-ekintza udalerriko segurtasuna, ekipamenduak eta azpiegiturak hobetzera bideratutako jardueretan oinarritu da. Egindako jarduketen artean, nabarmentzekoak dira Ereñoko erdigunean abiadura murriztuko gune bat sortzea segurtasuna hobetzeko eta trafikoaren abiadura murrizteko, eta erabilera anitzeko eraikinaren lehen fasea eta bigarren fasearen hasiera.

Hirigintza arloan, Udalak Hiri Antolamenduko Plan Orokorra (HAPO) berrikustea bultzatuko du; berrikuspen-prozedura 2025eko abuztuan abiatu zen ofizialki.

Udalaren jardueren artean, Ereño-Nabarniz baso-bidea mantentzeko eta garbitzeko lanak eta antzinako baso-bideak berreskuratzekoak ere aipatu behar dira. Horrez gain, Basetxetas-Atxoste auzoa urbanizatu da, Ereño eta Natxitu arteko bidearen zabaltze-lanak esleitu dira, eta hainbat auzotan eguzki-energia bidezko farolak jarri dira. Horri auzoetan informazio-panelak jartzea eta Atxoste auzoan beste jarduketa berri bat esleitzea gehitu behar zaio.

Azpiegitura eta zerbitzuen arloko jarduketez gain, Udalak udalerrian egiten diren kultura- eta kirol-jarduerak babesten jarraitu du, Ereñoko gizarte-bizitza dinamizatzeko ekarpen gisa.

Gertutasunetik aurrera egiten jarraitzea

Hurrengo legegintzaldiari begira, Ager Lejarreta Garrogerrikaetxebarriak lehentasunen artean ditu HAPO berria garatzea, udalerriaren etorkizuneko hazkundea antolatzeko eta hirigintza-beharrak planifikatzeko tresna gisa; Udaletxea berritzea, udal-instalazioak hobetzeko; postontziak berritzea; Udaletxearen aurrean ibilgailu elektrikoentzako kargagailuak jartzea; eta herritarrekin harreman zuzena izaten jarraitzea, auzoen eta udalerri osoaren beharrizanak ezagutu eta horiei erantzuteko.

Ildo horretan, hautagaiak entzutea eta gertutasuna oinarri hartuta lanean jarraituko du, herritarren ekarpenak udalerriko lehentasunak zehazteko prozesuan txertatuz eta gaur egun martxan diren proiektuei jarraipena emanez.

Horrela, Lejarreta Garrogerrikaetxebarriaren hautagaitza udal-kudeaketan pilatutako esperientzian eta lurraldearen ezagutzan oinarritzen da, hasitako proiektuak amaitzeko eta datozen urteetan Ereñok izango dituen behar berriei heltzeko helburuarekin.