Prentsaurrekoan, EBBren bozeramaileak hauxe jakinarazi du: «Espero dugu Espainiako presidenteak ez diola aukera historiko honi bizkarra emango, eta ausardiaz eta borondate politikoz helduko diola». Gainera, Urkulluk esan du jarrera horrek euskal gizartearengan frustrazioa sorrarazteari uzten lagunduko liokeela. Edonola ere, buruzagi politiko batzuek egin dituzten adierazpenen ildotik, zera adierazi du: «Zoritxarrez, badirudi jarrera negatiboa izango dugula inguruan; ausardia eta borondate politiko eza».

Bestalde, ANVk hauteskunde orokorretan izateko adierazi duen nahiari erantzun dio Iñigo Urkulluk. «Gustura gaude politika egin nahi dutelako; ea behingoz ezker abertzalea politika egiten hasten den», adierazi du. «2004ko azaroan ere gauza bera entzun genuen; zoritxarrez, urte batzuen buruan, ikusi duguna ikusi dugu», gogorarazi du Urkulluk.