Guggenheim Fundazioaren arau estrategikoari jarraiki, eraikin apartekoa eta enblematikoa izango da, artelana. Baina, oraingoan, beste Guggenheimen ondoan desberdintasun bat izango du: biosferan erabat txertatuta egon beharko da. Hasiera batean, euskal kostaldean erakusketa zirkuituak ipintzea aztertu zuten, turistentzako ibilbide kultural erakargarria sortzeko asmoarekin. Baina, azkenean, Urdaibain eraikin bakarra ipintzea erabaki zuten.

Ahaldun nagusiak jakinarazi zuen Bizkaiko Foru Aldundiak guztira ehun milioi euro bideratuko dituela proiektu honetarako. Era berean, gaineratu zuen arkitektura mota erabat ekologikoa eta iraunkorra izan beharko dela, energia berriztagarrien alorreko euskal enpresentzat motor izango dela eta iraunkortasunaren alorreko abangoardiako sistemak izango dituela.