"PSEren eta PPren arteko akordio horri jarraiki, Trantsizio garaitik gaur arte indarrean egon den arau demokratikoenetako bat -Legebiltzarreko mahaiaren banaketa proportzionala handienetik txikienerako ordenan-, eta herriaren borondatea zinez errespetatzen zuena, urratu da. Legebiltzarreko bigarren eta hirugarren alderdiaren artean trikimaina bat egin dute Eusko Legebiltzarrean gehiengoa duen alderdiari presidentzia kentzeko. Hori bada etorkizunean gobernatzeko erabiliko duten justizia eta berdintasuna, bide ilun baterantz abiatzen ari gara, inboluzio politikorantz" gaineratu du.

Ortuzarren aburuz, "atera dugun bigarren ondorioa da PSEk eta Patxi Lópezek, Ajuria Enean berralokatuta bizi nahi izateagatik, euskal autogobernuaren giltzak PPri eman dizkiotela, Euskadiren garapen politikoaren aurka gogorren egin duen alderdiari. Eta hori ez dugu guk esan, Lópezek berak esan zuen Basaurin egin zuen mitinean; hantxe adierazi baitzuen, behin eta berriz, ez zuela PPrekin akordiorik egingo".

"Eta hori guztia anbizio politikoagatik, egoismo eta egolatria hutsagatik. Hauteskundeetan aurrerapenak eta transbertsalitatea ekarriko zuela zin egin zuen alderdiak, orain, eskuin neoliberal eta zentralistenak luzatu dion berunezko eskuari heldu dio".

Bukatzeko, BBBren presidenteak azaldu du baita "gezurra eta koherentzia falta, politikan, garesti ordaintzen dira. Eta horiexek dira, hain zuzen, Patxi Lópezek Ajuria Enerako bideari ekiteko bere gain hartu dituen bi jarrerak".

Greba orokorra

Hilak 21erako deitu duten greba orokorrari buruz galdetuta, EAJ-PNVko Bizkai Buru Batzarreko Andoni Ortuzar buruak adierazi du "uste dugu Euskadik ez duela grebarako garairik. Krisialditik ateratzeko lan egin behar dugu. Elkarrizketa sustatu behar dugu, konponbideak bilatu ahal izateko. Eusko Legebiltzarrak ez-ohiko osaera edukitzeak beste sektore batzuk kutsatzen hasi da eta horrek kezkatzen gaitu. Gure aukera erantzukizuna eta gizarte eragileen arteko batasuna da".