Barakaldon eskainitako adierazpenetan, Ortuzarrek eskaera bat egin dio Patxi Lopezi: bihartik aurrera idazkari nagusia izateari uztea "lehendakari izateko, eta gure gizarteak dituen arazoei aurre egiteko".

Ildo horretan, "mahai gainean bi arazo zail" ditugula gogorarazi du, eta egoera honetan euskaldun guztien lehendakaria dela erakustea eskatu dio Ortuzarrek.

Lehentasunak

Jeltzaleak azaldu duenez, alde batetik ozeano Barean bahituta dagoen Alakrana atunontziaren arazoa daukagu. Bestalde, Espainiako Gobernuaren esku dagoen kontzertu ekonomikoaren segurtasun juridikoa bermatzea.

Horregatik, "herrialde honen lehendakaria izatea eta guretzako hain zailak eta mingarriak diren arazoei irteera bat bilatzea" eskatu dio Ortuzarrek Lopezi.