Bileran aztertu dituzten lanen artean izan dira hilabete honetan Senatuan onartu den Aire Bidezko Nabigazioaren gaineko Legea, onartua izan delarik ere jeltzaleek AENA, AESA eta Loiuko aireportuaren mugakideak diren udalerrietako udalen arteko lan sistema etengabea eta egokia ezartzeko aurkeztu duten zuzenketa. Lankidetza hau aireportuaren etorkizunaz eztabaidatzeko eta komunikatzeko erakunde iraunkorraren bidez egiten da, Europako beste aireportuetan egin ohi den bezala.

Era berean mintzatu dira hezkuntza alorreko gaiez, besteak beste Zamudioko Bigarren Hezkuntza eta Batxilergo institutu berriaren inguruan. Iragarri dutenez Eusko Jaurlaritzaren Hezkuntza Sailari eskatu zaio honen inguruko erabakia hartzen ez den bitartean Derioko institutua handitzeko lanak egin daitezela.

Halaber, alkate eta zinegotzi jeltzaleek Lezamako alkatesari beren laguntasun eta babes osoa adierazi diote  "ondo baino hobeto ezagutzen dugu zein den Lezama eta Txorierri osoko EAJren ordezkarien helburu nagusia, hau da, hauteskunde konpromisoak betetzea eta hiritargoaren eskariei erantzutea, kasu honetan gazteentzako etxebizitza babestua eta tasatua eraikitzea ahalbidetuko duten hirigintza egitasmoak garatzea".