Bizkaiko ahaldun nagusiak, José Luis Bilbaok, eta Ogasuneko foru-diputatuak, José María Iruarrizagak, 2011ko ekitaldirako aurrekontuen proiektua eta Zerga Neurriei buruzko foru-araua aurkeztu dituzte. Ahaldun nagusiak onartu egin du gaur egungo egoera ekonomikoa zaila dela, eta honela definitu du legegintzaldi honetako azken aurrekontua: "soila, errealista eta gure gizarteak dituen benetako beharrei oso lotua. Gainera, gure jarduera guztiak bezala, printzipio honetan oinarritutakoa: 'Erein, gero jasotzeko, aberastasuna sortzeko eta aberastasun hori banatu ahal izateko'".

Lehenengo eta behin, José Luis Bilbaok Bizkaiko Herri Kontuetan 2011rako aurrez ikusitako jarduerak ezartzen dituzten bi gidalerroak hauek direla nabarmendu du: "batetik, pertsonen aldeko apustu irmoa, Bizkaian inork ere bere burua baztertuta ikus ez dezan bizi dugun egoera ekonomiko zail honetan, eta, bestetik, inbertsio publikoari eustea, jarduera ekonomikoa bultzatzeko palanka modura, aldundiak ahal duen neurrian jarduera ekonomikoaren galera leuntzeko". Ostean, aurrekontuen proiektuaren datu nagusiak zehaztu ditu.

Aldundiko sailen kudeaketa propioko aurrekontua 2011ko ekitaldirako 1.468 milioi eurokoa da, 2010ekoa baino %6 handiagoa. Hor, bereziki, Gizarte Ekintza Saila nabarmentzen da, 709 milioi eurorekin 2011n, 2010eko ekitaldian baino %8 gehiago.

Gizarte Ekintzako hazkunde iraunkor horrek eragina izan du gainerako sailetan, eta horien aurrekontu-zuzkidura murriztu egin da, oro har. Halere, Bilbaok hau adierazi du: "Bizkaian ezer ez da egin barik geratuko, laguntza-neurri guztiak mantentzen ditugu gure biztanleriako sektore guztietarako, arreta berezia emanez gure enpresa- eta ekoizpen-egituraren garapen ekonomikoari. Horrez gain, 9,7 milioi euroko partida jasotzen du lankidetza- eta garapen-proiektuetarako, eta Bizkaiko udalek, euren finantzaketarako, 793,8 milioi euro jasoko dituzte (781 Udalkutxakoak eta 13 Gizartekutxakoak)".

Azkenik, aurrekontuan jasotako inbertsio garrantzitsuenetako batzuk nabarmendu ditu. Horiek, guztira, 448,8 milioi € batzen dute, 2010ean baino %3,7 gehiago. Zehazki, hauetara bideratutakoak: gizarte-azpiegiturak, Euskalduna Jauregia, Guggenheim Museoa, San Mames aldeko EHUko Campusa, San Mames Barria, BiscayTIK, AIC, Bilborako sarbideak, errepide-ardatz erradialak eta beste bide-azpiegitura batzuk, obra hidraulikoak, TMB instalazioa, FEVE lurperatzea, BGPra metroko 1. eta 2. lineetarako, eta metroko 3. linea eraikitzea.