EAJ-PNVren udal taldeak 2026rako Udal Aurrekontuen aurka bozkatu du “kontinuistak, anbizio gutxikoak eta bermeotarren benetako lehentasunetatik urrun daudenak” direla iritzita.

Ander Garate zinegotziak adierazi duenez, “ia 2024 eta 2025ekoen erreplika bat dira. Ez dago plangintza estrategikorik, ez dago proiektu berririk eta ez zaie aurre egiten herritarren egunerokotasunari eragiten dioten arazoei”.

EAJ-PNVren ustez, aparkalekuen falta, hiri-garbiketa, irisgarritasuna, auzoen mantentze-lanak edo segurtasunaren hobekuntza bezalako gaiak ez dira ausardiaz landu oraindik.

“Bermeok aurrera egitea behar du. Ezin dugu beste urte bat utzi norabide argirik gabe”, esan du Garatek.

Zortzi zuzenketa atzera botata: akordiorako borondaterik gabe

EAJ-PNVk zortzi zuzenketa erregistratu zituen, jarduketa zehatz eta bideragarrietan zentratuak, auzotarren eskariei zuzenki lotuak. Gobernu taldeak denak atzera bota zituen.

Proposamenek honako hauek jasotzen zituzten:

1.           Aparkaleku berri bat egitea Tellaetxe tar Josu kalean.

2.           Edukiontzi marroiak berritze-kontratuan sartzea, gaur egun hondatuta daudenak ordezkatzeko.

3.           Etxebizitza turistikoen erregistroa eguneratzea eta jarduera irregularra atzematea.

4.           Garbiketa berezietarako partida indartzea eta garbiketa-plan berria gauzatzea.

5.           Agarre auzoan eguzki-farolak jartzea.

6.           Bizkaiko Jaurerria kaleko irisgarritasunaren, antolamenduaren eta bide-segurtasunaren hobekuntza integrala.

7.           San Martin haur parkeko estalkia.

8.           “Nagusien Behatokia” programa suspertzea, bakardade eta zaurgarritasun egoerak detektatzeko.

“Neurri onargarriak eta beharrezkoak dira. Ez gara proiektu handiez ari, eguneroko arazoei irtenbide praktikoak emateaz baizik. Erabateko gaitzespenak akordiorako borondate falta erakusten du”, azpimarratu du Garatek.

Bermeo eremu tentsionatua deklaratzeari ez

Bestalde, EAJ-PNVk Bermeo eremu tentsionatu izendatzearen aurka bozkatu du, EH Bilduk planteatutako neurria ez dagoelako behar bezala justifikatuta eta alokairuko etxebizitzen eskaintza are gehiago murriztu dezakeelako.

Alderdi jeltzaleak defendatu duenez, udalerriko arazo nagusia ez da espekulazio egoera orokor bat, etxebizitza eskasia baizik. Gainera, gogorazi du etxegabetzeen kopurua ez dela esanguratsua, eta “etxebizitza hutsen zati bat bigarren egoitzak direla, edo birgaikuntza behar dutela”.

“Eskaintza handitu gabe prezioak mugatzeak lortu nahi denaren kontrako efektua eragin dezake. Merkatuan esku hartu aurretik, Udalak bere baliabideak mobilizatu eta kudeaketa hobetu behar du”, adierazi dute.

Bermeoko EAJ-PNVk berriro esan du, murrizketa berriak hartu baino lehen, EH Bilduk udal etxebizitzak alokairura gehitzeko eta etxebizitza babestuetarako erabilgarri dagoen lurzoru publikoa garatzeko lan egin beharko lukeela.