Usansoloko EAJ-PNVk mozio bat aurkeztu du Osoko Bilkuran etxebizitza eskuratzeko plan integral bat abian jartzeko helburuarekin, alokairua eskuragarria izateko eta udalerrian legez kanpoko okupazioaren aurrean segurtasun juridikoa indartzeko.

Alderdi jeltzaleak nabarmendu du Usansolok une erabakigarria bizi duela udalerri independente gisa sendotzeko bidean, eta erronka nagusietako bat dela herritarrek, bereziki gazteek, beren bizi-proiektua herrian bertan garatu ahal izatea bermatzea.

Proposamenak barne hartzen du gobernu-taldeari eskatzea azterketa tekniko bat has dezala Hiri Antolamenduko Plan Orokorra (HAPO) eguneratu edo aldatu ahal izateko, lurzorua libre uzteko bizitegi-sustapen berrietarako, babes publikoko etxebizitzak eta zuzkidura-bizitokiak lehenetsiz. Usansoloko EAJ-PNVk uste du eskaintza zabaltzea beharrezko neurria dela gazteentzat eta familientzat benetako aukerak sortzeko.

Gazteentzako Etxebizitza Plana

Mozioak, halaber, Gazteentzako Etxebizitza Plana sortzea proposatzen du, lankidetza publiko-pribatuko formulak sustatzeko, alokairu eskuragarria bultzatzeko eta emantzipazioa errazteko. “Etorkizuna izango duen Usansolo bat eraiki nahi badugu, gure gazteek hemen geratzeko aukera izan behar dute, eta herriaren garapen sozial eta ekonomikoan parte hartu”, adierazi dute jeltzaleek.

Testuak, gainera, legez kanpoko okupazioaren aurrean jarduteko udal protokolo bat egitea planteatzen du. Protokolo horrek barne hartuko lituzke kaltetutako jabeentzako aholkularitza juridikoa, Ertzaintzarekin eta udal zerbitzuekin koordinazioa, eta okupazio-arriskuan dauden etxebizitzen zaintza. “Etxebizitza eskuratzea, legea errespetatzearekin bat etorri behar da, eskutik doaz. Alokairu merkatuak ondo funtzionatu dezan, ezinbestekoa da etxebizitza alokairuan jartzen dutenek bermeak eta segurtasuna izatea”, azpimarratu dute.

Horrez gain, zerga-neurriak eta birgaitzeko laguntzak aztertzea proposatu dute, etxebizitza hutsak alokairu merkatura bideratu nahi duten jabeei segurtasun gehiago eskainiz.

Ekimen horrekin, Usansoloko EAJ-PNVk berretsi egiten du politika hurbil, arduratsu eta emaitzetara bideratuaren aldeko konpromisoa. Etxebizitza eskuratzeko aukera gehiago segurtasun juridikoarekin eta bizikidetzarekin uztartuko dituen eredu baten alde. Helburua etorkizuna duen udalerri moderno eta kohesionatu baterantz aurrera egitea da.